關於早教

首先聲名，我沒有好認真地去研究有關早教既不同派別(冇貢好心機)或比較不同類型早教既教材 (冇貢多錢呢)，更不是要我家Baby 赢在什麼起跑線 (其實條線係邊? 終點又係咩呢?); 我只係簡單地認同0-3歲喺細路既智力發育黃金期，亦可能喺細路一生與父母最親密既時期，亦喺細路面對最少(甚至是零)壓力既時段，如果父母可陪伴細路喺呢段蜜月期去玩、去開發潛能同培養良好既學習興趣同動機 (我既終極目標)，雙方或多或少都會有所得著。

 

 

我估大部分新手父母都會唔多唔少實際早教，如喺屋企中採用早教教材、送細路上playgroup, 簡單如同細路講故事，陪細路玩游戲做小手工，一齊睇兒童DVD，但並非有系統地或有計劃地去做。實際上好多時候都可能好似我一樣，偶爾因上網隨意click click (如有團購）或和其他friend吹水閒聊時忽發奇想或者有某目的(如備戰幼稚園interview )，抱著試下冇執輸或人有我有既c9心態去試試。試過如覺得自己細路受用就繼續，如冇即時功效就放棄或轉軚。我覺得早教打亂章問題不大，抱住輕輕鬆鬆(玩吓)既心態去做就可以，最重要係唔好勉強細路去接受，佢唔like 或唔多吸收到既話可遲一d或大個小小再試(RELAXXXX~~~~)；另外，老土講一句，每個小朋友既development 同性格唔同，你個friend 既小朋友啱用嗰套未必啱你自己個小朋友用，千祈唔好比較（要真正比較既機會遲d會多到避不鳥）。