幼稚園(K班)面試備戰 (一)之報名

N 班都未開始讀，又要去打K呢場杖喇…

 

幾時開始要報名K班呢?　只要好簡單將小朋友出生年份月加3年，知道邊一個年度入學，就係前一年嘅年中開始留意各幼稚園公佈既收生程序。

因為一般足兩歲八個就可以讀 (但有個別名幼喺申請時會註明出世既月份，即係就算係啱啱足兩歲八過月都未必可以申請），例如小朋友2012年2 月或12 月出生，都可以係2015年度9月入學。

 

點樣選擇報K班呢? 首先，可以先問下自己兩條問題。

1.      有冇心水小學 ?

未諗/冇 – 有時間既諗下會好D，唔想諗住就算。

有   -  心儀官立或津貼小學既，基本上派官小/津小同讀邊間幼稚園係冇關係 (叩門另計); 心儀直資或私立小學既，就可能要選擇一D考直資或私小track record比較好或課程比較深嘅幼稚園打好個底。

 

補充:

咩野為之官立、津貼、直資、私立小學 ?  可以參考以下資料。

http://www.myschool.hk/education-2-4.php

 

課程深淺 (谷唔谷)係比較既，亦都可以係主觀既，舉例有人認為3歲幾人仔唔應該K1就學寫字 ，變相一早就教寫字既幼稚園就叫做深; 亦有人認為谷唔谷在於功課量有幾多同有冇測驗。我自己就會以教育局對課程嘅指引為benchmark，佢嘅指引suppose係按照一般小朋友既正常發展而定，唔應該做我就理解為超越佢地發展，即係谷 (例如:不應要求幼兒班的兒童執筆寫字、不應以默寫、測驗或考試作為評估兒童的方法)。

http://www.edb.gov.hk/tc/edu-system/preprimary-kindergarten/quality-assurance/dos-donts-for-kindergartens/index.html

 

2.      有冇特別需要? 例如….

學卷 –因為礙於資源有限同要符合教育局嘅期望，有學卷嘅幼稚園一般課程會比較淺，但同時由於唔需要特別focus學術，相對地又會比較著重小朋友既其他需要 (例如德育、愉快體驗)。

宗教 – 一般天主教或基督教既都好著重德育嘅training 。

直屬/聯繫中、小學(俗稱龍校) -– 大部分家長既心態都係有龍校做 backup 去打P 場戰，會冇貢大壓力 (但注意e家既係所謂龍校小學收返自己幼稚園學生比例愈來愈少，而好多龍校係俾小學既offer同時亦會要求家長放棄參加教育局既統一派位 )，而龍校嘅課程又會比較淺。

 

補充:

嚴格黎講，幼稚園升小學係冇「一條龍」制度，因為教育局規定「一條龍」只限中小學連結，所以幼小「一條龍」其實只係學校自製的。

 

3.      對小朋友既期望?

剩係問呢一條問題，相信大部分既家長既model answer係希望小朋友健康同快樂地成長。另一方面，唔少家長又想望囝/囡成龍，所以成日要 出名催谷型vs. happy school (要學術定要愛心??)或谷校 vs.龍校 (要實力去考直資/私小定要買個保險 ??)。

 

我自己呢?　我係望囡成龍type，自然buy課程谷，係天主教徒，心水小學亦係九龍區最爭崩頭果幾間傳統天主教女校同私小，加上已有兩個 K offer(一間讀緊N，另一間報N但預比K )揸手同做大B既backups，就選擇左高風險（以細B黎講）既報K package，即只喺報左大約total十間既谷校（只限九龍區）同龍校（包括港島區）。亦係因為喺細B嘅原故，有幾間名幼同龍校想報都冇得報呢。